السلام عليكم يا جماعة أتمنى تكونو
بخير و أنا آسف ع التأخير عليكو و إنشاء الله هنبتدى النهاردة الجزء الأول من ورشة
( احمد و منى ).
طيب يعنى إيه أساسا ورشة احمد منى ... ايوة زى ما انتو توقعتو هى عن طريقة
التعامل بين الرجل و المرأة ... اى رجل و اى امرأة مش شرط يعنى تكون الزوجة او
الخطيبة او كدة يعنى إنما ممكن تكون منى ماما او اختك او جارتك لو زميلتك فى الشغل
او حتى جدتك و العكس صحيح يعنى احمد ممكن يكون اخوكى او خالك او زوجك او ابنك .
بالمناسبة يعنى او بالمرة انا يهمنى
فى الاساس فى الورشة دى انك تعرف / تعرفى كيفية التعامل مع شريك / شريكة حياتك و
طبعا تدرب / تدربى من دلوقتى للتعامل مع الطرف الاخر ايا كان بمعنى ان انت تدرب فى
امك و اختك و انتى تدربي فى اخوكى و ابوكى لحد ما ييجى صاحب النصيب و يريحنا منكم.
اولا : خلينى اسأل سؤال هو الست زى
الراجل ؟
مش عايز تريقة لكن كتير بيقولو ان
مافيش فرق فى اى حاجة و اننا كلنا بنى ادمين خلينا بقى نجيبها من عند العلى الكبير
سبحانه و تعالى و اللى مافيش بعد كلامه كلام اللى قال فى سورة ال عمران ( و ليس
الذكر كالانثى )
طب خلينى اسأل سؤال تانى هو ده يبقى
عدل ؟
هو مين اللى قال ان العدل معناه
المساواة لو كان كدة كنا كلنا بقيتا اغنيا او كلنا بقينا عندنا ذرية او كلنا
صالحين و يا اما يكون مافيش عدل لكن سبحانه و تعالى اعطى لكل واحد فينا اللى
يناسبه و اللى يقدر يعيش بيه ... مش عايز اطول اوى فى الموضوع بس لازم التوضيح ده.
ثانيا : شوية احصائيات كدة عالماشي
بدون تعليق.
صدر فى جريدة الاهرام الاتى من
سنة انه من كل 10 فيه 4 بيتطلقو فى السنة
الاولى و ان من كل 10 برضه 5 بيتطلقو فى السنة التانية و ربنا يعافينا.
ثالتا : شوية اختلافات كدة ظاهرية ع
الماشي من غير الدخول فى صلب الموضوع.
احمد غالبا بيستخدم 7 او 8 حاجات فى
الحمام الا وهم : الفوطة، معجون الاسنان، فرشاة الاسنان، ماكينة الحلاقة، معجون
الحلاقة، الصابونة، و لو ربنا كرمه هتبقى الحاجة الاخيرة الليفة.
منى بقى حسب اخر احصائيات بتستخدم
238 حاجة ( على فكرة دى مش تهريجة دى احصائية حقيقية ) الراجل لو شاف نص الحاجات
دى مش هيعرف اساميها.
منى تلاقيها عارفة ان الحيطة
الفاضية اللى فى الصالة محتاجة اللوحة الفلانية اللى شافتها امبارح فى البازار
العلانى، طبعا احمد يرجع مايلاقيش الحيطة اصلا هو ده اللى يلفت نظره.
احمد ومنى لو مثلا فى حفلة جواز بنت
خالة منى طبعا تكون خدت بالها من عدد المعازيم و كل واحد و واحدة لابسين ايه و
العروسة ابتسمت كام مرة و العريس كح و هرش كام نوبة . اما احمد فكل اللى خد باله
منه ان اللحمة اللى كانت فى البوفيه كانت كندوز و مش مستوية كويس.
احمد ومنى فى نفس الفرح و منى عايزة
تدخل الجمام تلاقيها لفت على واحدة واحدة من المعازيم عشان يروحو معاها و كأن
الحمام ده قاعة اجتماعات مش مكان للراحة.
طيب فى الاساس احنا هنتكلم عن ايه ؟
هنتكلم اصلا عن 5 اختلافات اساسية
بين احمد ومنى اللى عاملين المشاكل ما بينهم و هم :
1 - طلب و عرض المساعدة.
2 - الاحتياجات العاطفية.
3 - رد الفعل امام المشاكل.
4 – اللغة ( وخدو بالكو اوى من
الجزء ده هتستغربو منه جدا ).
5 – الاحتياجات النفسية.
بس قبل كل ده خلينى اشدكو كدة
بمقدمة صغيرة هاقرا اللى فى عقل و قلب كل احمد فيكو تجاه منى و العكس عشان تتاكدو
بس انى مش جايب كلامى من ع القهوة انما هو كلام علمي صحيح.
منى دايما بتشتكى من احمد انه (
متبلد الاحساس، غير رومانسي، مابيسمعلهاش، مشتت الذهن، غير متعاطف، لا يستطيع
التعامل مع تقلباتها ).
احمد بيشتكىمن منى انها ( تنقصها
العقلانية، مثيرة للاعصاب، رغاية، بتنكر الجميل، ليها تلميحات غريبة ماتتطبلش
طلباتها دوغرى، دائمة التقييم ).
امثلة للى مافهمش حاجة (خدو بالكو
كلها عبارة عن حوارات و الحدق يفهم)
مثال 1 :
منى ( باكية ) : اسكت يا احمد مشي
بوسي القطة ماتت النهاردة فى حادثة عربية.
احمد ( فرحا ) : فى داهية دى كانت
قطة غلسة وشرانية و يعدين نبقى ننزل نجيبلك واحدة غيرها هى يعنى شغلانة.
مثال 2 :
منى : احمد مش هيام جارتنا جوزها
جابلها غسالة فول اوتوماتيك اول امبارح.
احمد : طيب.
منى : دى شكلها حلو اوى و غسيلها
يشرح القلب.
احمد : ربنا يباركلهم فيها.
مثال 3 :
منى : احمد انت ليه محلقتش دقنك
النهاردة
احمد : حاضر هحلقها.
منى : اصلها طويلة.
احمد : ما قلنا هنحلقها خلاص.
منى : اصلها غزيرة و مخلياك اسمر.
احمد : طب و الله ما انا حالقها.
موضوع: الجزء الاول من ورشة ( احمد ومنى ) 
السبت 07 نوفمبر 2009, 3:26 pm
